سمونیار جمعه الدین خاکسار، د کندز د امنیه قوماندانۍ ویاند، وایي چې د خانآباد ولسوالۍ امنیتي ځواکونو د تېرو اوو ورځو په لړ کې ۲۰ کسان د قمار وهلو په تور نیولي دي.
د ده په وینا، د کشفي راپورونو پر بنسټ، دا کسان، چې د خانآباد ولسوالۍ اوسېدونکي دي، په دوو بېلابېلو ځایونو کې قمار ته مصروف وو، چې د امنیتي ځواکونو له لوري لاس په لاس ونیول شول.
نوموړی زیاتوي چې له نیول شویو کسانو ۱۳ تنه د شیخعلي سیمې او ۷ تنه د خواجه بولک سیمې اوسېدونکي دي.
امنیتي ځواکونو د دې کسانو د نیولو پر مهال نغدي پیسې او د قمار اړوند وسایل هم ضبط کړي دي.
چارواکي وایي چې نیول شوي کسان به تر لومړنیو څېړنو وروسته عدلي او قضايي ادارو ته وسپارل شي.
