د خوست ولایت د بدني روزنې او ورزش آمریت اړوند د ټېپ بال کېکټ فدراسیون د استازولي له لوري د یاد ولایت مرکز اړوند غرغښت ښوونځي کې د ۲۵ خصوصي او دولتي ښوونځيو ترمنځ د ټېپ بال کرکټ سیالۍ د میټا خان ښوونځي په اتلولي پای ته ورسېدې.
د یادو سیالیو پای لوبه د غرغښت او میټا خان ښوونځيو لوبډلو ترمنځ ترسره شوه. د لوبې پچه غرغښت لوبډلې وګټله او لومړی یې د توپ وهنې پرېکړه وکړه، چې په ټاکلو لسو اورونو کې یې د خپلو شپږو لوبغاړو په له لاسه ورکولو سره خپلې سیالې لوبډلې ته د ۷۷ منډو هدف وټاکه. میټا خان لوبډلې ټاکلی هدف د اتو لوبغاړو په له لاسه ورکولو سره ترلاسه کړ او د دوو ویکټو په توپیر یې د یادو سیالیو اتلولي یې وګټله.
دا سیالۍ د ښوونځيو د زده کوونکو ترمنځ د سالم رقابت او همغږي په موخه پیل شوې وې، چې یوه نیمه میاشت یې دوام وکړ.