د کونړ ولایت د مرکز اسعداباد اړوند یو شمېر کلي د پاکستاني ځواکونو د وروستیو بریدونو له امله خالي شوي دي. د راپورونو له مخې، په دغو بریدونو کې ۱۸ تنو ته مرګژوبله اوښتې او ګڼې کورنۍ اړ شوې چې خپلې مېنې پرېږدي.
ځايي اوسېدونکي وایي، دغه بریدونه په وروستیو ورځو کې څو ځله تکرار شوي چې له امله یې خلک له جدي وېرې او اندېښنې سره مخ دي. د هغوی په وینا، ډېری کورنۍ شاوخوا خوندي سیمو ته کډه شوې او لا هم بېرته خپلو کورونو ته نه دي ستنې شوې.
د سیمې اوسېدونکي شکایت کوي چې د ناامنۍ له امله د دوی ورځنی ژوند سخت اغېزمن شوی، ماشومان له زده کړو پاتې دي او کرنیز او سوداګریز فعالیتونه درېدلي دي. همدارنګه، د سیمې هټۍ او بازارونه تړلي پاتې دي چې له امله یې اقتصادي ستونزې نورې هم زیاتې شوې دي.
د معلوماتو له مخې، بېځایه شوې کورنۍ له جدي بشري ستونزو سره مخ دي او بېړنیو مرستو ته اړتیا لري. ځايي خلک له مسؤلو ادارو او مرستندویه بنسټونو غواړي چې د دغو کورنیو لاسنیوی وکړي او د سیمې امنیت ته جدي پاملرنه وشي.
#کونړ #اسعداباد #بریدونه #بېځایه_کېدل #امنیت #بشري_مرستې